文／吳秀媛，新竹縣湖口鄉人，客家文化志工（腔頭：海陸腔）
該晡[註1]日，叔伯姊妹問佢[註2]︰「若[註3]倈仔逐[註4]隻月有分[註5]錢你無？」佢講︰「毋使[註6]哪！分麼个[註7]錢？𠊎毋拿佢兜个錢，𠊎自家有所費[註8]，毋使。」
「爺哀[註9]係子女這生人个『老佛爺』[註10]！」「做子女个愛好好『供養[註11]』，下二擺正會有福報；倈仔妹仔分你，你斯毋好客氣，加加減減摎佢拿起來。你愛知，你手骨有錢正有[註12]平安…。」叔伯姊妹大聲摎佢講。
吓[註13]？老佛爺！叔伯姊妹無食齋念佛，仰會恁樣[註14]講？
＊＊＊ ＊＊＊ ＊＊＊
係啦！人到一隻歲數[註15]，總係有多少病痛，像腰骨痠軟、牙齒痛、三高、糖尿病，甚至中風、失智、癌症種種不幸，在醫院肚碌[註16]著捩捩轉[註17]。這量時，錢，有影當重要，毋過，係講無子兒兼身[註18]，無親人在脣頭[註19]照顧，你敢會感覺著完全平平安安？
該後生人呢，有兜正出社會，頭路吂恁好勢；有兜身體無恁堵好，驚爺哀知會愁，自家在外背恬恬仔毋敢呻苦；甚至有兜在外背拚咧幾十年，雖然勤儉煞猛[註20]，毋過天公伯毋惜，到尾還係兩頭空个乜當多。該係平安無呢？該又係毋係幸福呢？
＊＊＊ ＊＊＊ ＊＊＊
佢摎叔伯姊妹講︰「講著錢銀，生無帶來，轉[註21]，乜無帶去。𫣆俚[註22]人生在世，做爺哀、為人子女，係一種緣份，一種幸福。時勢無共樣，這下人大體有讀過書，做世大人[註23]愛明理，愛曉得體諒後生人在外背生活个壓力。毋好動啊著斯在該摎人比麼个[註24]麼人麼人个子女分佢爺哀幾多幾多錢，愛比屋下大大小小無病無痛毋使牽腸掛肚[註25]；總講啊！毋管子女係在外背食頭路、做事業，也係兼等[註26]膴身[註27]脣，爺哀子女一屋人康康健健、平平安安，毋使在該兵挷齒扯[註28]、愁勞博激[註29]；一隻家庭大大細細、上上下下、和和挼挼[註30]、無愁無慮[註31]就係正實 [註32]个財富；這正係[註33]福，正係福報。」
＊＊＊ ＊＊＊ ＊＊＊
青堂瓦舍[註34]个前堂，佢口才好, 滑溜溜，講著樹頂个鳥仔都會分佢拐下來。其實，佢摎叔伯姊妹兩儕一句來一句去，講一百句乜係五十雙。兩儕講个其實平平係︰平安就係福。
叔伯姊妹聽了後，應講︰「平安係福。斷真[註35]有影[註36]。」
[註1] 晡︰音buˋ；本意為「申時」，用於表示時間或時段。該晡日︰那天。
[註2] 佢︰音gi；第三人稱，他。
[註3] 若︰音ngia；為第二人稱「你」的所有格，意為「你的」。
[註4] 逐︰音dag；每一。
[註5] 分︰音bunˋ；給。
[註6] 毋使︰音m siiˊ；不用、不需要。
[註7] 麼个︰音maˊgaiˇ；疑問代名詞，如同華語的「什麼」。
[註8] 所費︰音soˊ fuiˇ；支出的費用。
[註9] 爺哀︰音rha oiˋ；父親和母親。
[註10] 老佛爺︰此處用華語讀。
[註11] 供養︰此處用華語讀。
[註12] 正有︰音zhangˇ rhiuˋ；才有。
[註13] 吓︰音haˊ疑問詞。
[註14] 恁樣︰音anˊ ngiong ；這樣、這般。
[註15] 歲數︰音soiˇ siiˇ；年齡。
[註16] 碌︰音lug；繁忙。
[註17] 捩捩轉︰音lid lid zhonˊ；不停的轉動。形容人焦急或忙碌的樣子。
[註18] 兼等︰音giamˋdenˊ；靠近、接近。
[註19] 脣頭︰音shun teu；旁邊。
[註20] 煞猛︰音sad mangˋ；努力、勤奮。
[註21] 轉︰音zhonˊ；回去。
[註22] 𫣆俚︰音enˋli ；我們。
[註23] 世大人︰音sheˇtai+ ngin；長輩。
[註24] 麼个︰音maˊ gaiˇ；什麼。
[註25] 牽腸掛肚︰音kienˋ chong guaˇ duˊ；比喻十分操心、掛念。
[註26] 兼等︰giamˋdenˊ︰靠在一起。
[註27] 膴身︰音vu shinˋ；身體。
[註28] 兵挷齒扯︰音binˋ bangˋ chiˊ chaˊ；事情繁多，十分忙亂，形容忙得不可開交。
[註29] 愁勞博激︰音seu lo bog gi；既憂愁又激動。
[註30] 和和挼挼︰音fo fo no no；和順親睦、相處融洽。
[註31] 無愁無慮︰音mo seu mo li+；憂慮、顧忌。
[註32] 正實︰音zhinˇ shid；真的。
[註33] 正係︰zhangˇ heˇ；才是。
[註34] 青堂瓦舍︰音ciangˋ tong gaˊ shaˇ； 指大房瓦舍、富有人家的房子。
[註35] 斷真︰音donˇ zhinˋ；真的。
[註36] 有影︰音iuˋ rhangˊ；果真，的確是。
華語
那天，堂姊妹問她︰「妳兒子每個月可有給妳一些錢？」她說︰「不用啦！給什麼錢？我不拿他們的錢，我自己有，不用。」
「父母是子女這輩子的『老佛爺』！」「為人子女者應好好『供養，來日才會有福報；兒女給妳，妳不用客氣，或多或少妳都要收下。妳要知道，妳手頭上有錢才平安…。」堂姊妹大聲說道。
啊？老佛爺！堂姊妹並無吃齋念佛，怎會如此說？
＊＊＊ ＊＊＊ ＊＊＊
沒錯啦！人到了一個年齡，總是多少會有些病痛，像腰酸背痛、牙齒痛、三高、糖尿病，甚至中風、失智、癌症種種不幸，在醫院裡頭搞得團團轉。這時，錢，的確很重要；但是，假若子女都不在身邊，沒有親人在旁照顧妳，妳難道會感覺絕對平平安安？
那年輕人呢，有些方踏入社會，職業尚未穩定；有些身體微恙，唯恐父母知道後會擔心，在外默默承受不敢叫苦；甚至有些在外頭辛苦了幾十年，雖然勤儉刻苦，只是老天爺未憐惜，到最後仍是兩頭空者也很多。那是平安嗎？那又是否是幸福呢？
＊＊＊ ＊＊＊ ＊＊＊
她對堂姊妹說︰「講到錢，生不帶來，死，也沒帶去。我們人生在世，做父母、做子女，是一種緣份，一種幸福。時代變遷，現在一般人大部分都讀過書，做長輩要明理，要知道體諒年輕人在外生活的壓力。不要動輒就和其他人比誰的个子女給父母多少錢？要比家裡是否大大小小沒病痛不用牽腸掛肚；總之，不管子女是在外頭上班、創業，或是貼在身邊，父母子女一家人健健康康、平平安安，不用在那兒忙得天旋地轉、愁苦萬千；一個家庭大大小小、上上下下、和和氣氣、無憂無慮就是真正的財富；這才是福，才是福報。」
＊＊＊ ＊＊＊ ＊＊＊
青堂瓦舍前棟，她口才好, 滑溜溜，說得樹頂个鳥兒都會被她拐了下來，她和堂姐妹兩人一句來一句去，千言萬語，也仍是原地打轉。其實，兩人的共識即平安就是福。
堂姊妹聽了後，回稱︰「平安是福。的確是。」